電動單車任我行？日前有街坊目擊有個女人揸住架有太陽傘嘅電動單車，喺粉嶺街上穿插，人車爭路，險象環生，有人報警，警方噚日派人巡邏監視，終於見「單車女」再次出巡，將她人車並獲。
有街坊日前喺fb群組「上水人大聯盟」上載一條片，指喺上星期四上晝9點影嘅，片段見一個女人揸住架電動單車喺粉嶺車站路同新運路交界行駛，當時架車載住一個女童，單車上面有太陽傘遮蔭，加裝小童專用後座、倒後鏡，喺馬路上掂行掂過，有街坊見到直斥嗰個女人「以為自己喺大陸？」仲有人報警㖭。
四宗罪被捕
警方收到舉報之後，認真處理，連日派出新界北總區交通部執行及管制組嘅特遣隊人員，喺粉嶺單車徑同馬路口巡邏監視，直到噚日朝8點半，終於撞正嗰位女士揸住部「豪裝」電動單車，沿粉嶺圍近粉嶺中心對開單車徑駛至，立即上前截停調查，揭發個女人原來係38歲內地人，持雙程證嚟香港，平日負責踩電動單車接送個女返學放學同買餸。警方以駕駛未有登記的車輛、駕駛時冇駕駛執照、冇第三者保險而使用車輛、冇戴上防護頭盔嘅情況下駕駛等四宗罪，將「單車女」拘捕帶署，睇嚟佢都好長手尾。
其實根據運輸署法例，無論係電動滑板車定電動單車，都被視作「汽車」，必須獲發牌先至可以喺馬路上行走，但當局一早講明唔會向任何電動單車發牌，所以電單車喺馬路、行人路、單車徑同公眾地方行駛都係違法，不過購買就冇問題。
