澳門民主派立法會議員蘇嘉豪，因刑事官司纏身，暫停議員職務超過200日。官司了結，蘇嘉豪噚日終於正式復職，佢一收到通知即刻趕去立法會開會。佢同八方講，復職喺現階段可話係鬆一口氣，但被控嘅非法集會係刑事案件，對公民行使自由權利有一定嘅負面影響，「呢點係唔敢講（復職）高興嘅原因」。
蘇議員話，復職後比停職前更有壓力，因為社會氣氛更緊張，公民權利同自由進一步收窄，重申會「如履薄冰」咁做事，鬥志亦無改變，「會繼續幫社會上未能發聲嘅人，喺立法會上大聲講出嚟」。佢又話下月係澳門「天鴿」風災一周年，佢嘅辦事處過去大半年喺地區收集到唔少民間聲音，將喺議會上跟進。
蘇嘉豪前年喺禮賓府請願同投擲紙飛機，被控非法集會，今年5月被判罪成，罰款約4萬元澳門幣，蘇最後決定撤回上訴，以及早恢復議員職務。