向來關心樹木生長狀況嘅「樹博士」、港大講座教授詹志勇，原來已經加盟香港教育大學，出任研究講座教授（地理與環境科學），噚日履新嘅佢首項要務係為教大社會科學周嘅講座擔任講者，提升中學生對地理同綠化環境嘅興趣。
預告為劏房「把脈」
咪以為「樹博士」只係關心樹木，查實佢好關注劏房戶嘅生活環境，佢話上任後會透過問卷同儀器，分析了解劏房戶面對嘅生活問題，例如日照、濕度、空氣質素同通風等，佢慨嘆香港作為大都會城市，物資條件理應相對豐富，無奈入住劏房嘅人卻越來越多，期望透過研究調查，令社會反思劏房問題。
多年嚟研究樹木嘅詹教授亦對教大校園讚不絕口，指建築物設計同大自然融合，綠意盎然，又指教大嘅樹木種類繁多，建議多種開花樹木，令校園環境更心曠神怡，笑稱若有需要，樂意做教大顧問，就校園綠化畀意見喎。
詹教授稍後會同太太一齊遷入教大宿舍，享受群山環抱、地靈人傑之景。65歲嘅詹教授仲講到明熱愛研究，從未諗過要退休，好開心得到太太支持繼續學術工作。佢話喎，未來幾個月要到海外出席學術會議，但如果情況許可，會安排同太太同行，爭取二人相處時間，認真羅曼蒂克噃！
李八方