再有地區小型工程建設惹爭議，一幅喺鰂魚涌天橋底、花費54萬元嘅行人天橋底矮石牆，因連日大雨注水變咗「金魚缸」，俾巿民投訴毫無用處之外，仲有惹蚊患嘅嫌疑，結果惹來大量網民留言揶揄，令人哭笑不得。
網民曲讚唔漏水勝沙中綫
民政事務總署每年撥款近5億元喺全港18區推行小型工程計劃，款項由區議會審批，但實際效用成疑，fb群組「樂活鰂魚涌」近日有人貼文，話鰂魚涌英皇道行人天橋底，2015年中進行美化工程，原本放置花槽改為建設9幅矮石牆同凳仔座椅，原本係增加休息同綠化地方，但近來連場大雨，石牆中間嘅扇形膠幕中空設計，雨水有入無出，結果變咗「金魚缸」，加上日曬雨淋，水底湧現青苔呈墨綠色。
網民話個工程由區議會批核，原本估價40萬元，完工埋單要54萬元，簡直係浪費公帑。其他網民睇完之後都積極留言，有啲就揶揄「唔漏水喎！好過沙中綫呀！」有啲就講笑話：「度雨量㗎，識咩吖你哋！」仲有網民認為呢個「養蚊」設計根本似「垃圾崗」多過美化，大家又點睇呢？