豆腐沙中綫醜聞續揭續有，但至今承建商禮頓繼續唔回應，唔少建制派保皇行先唔敢支持特權法徹查，身兼港區人大代表嘅立法會鐵路事宜小組主席田北辰似乎唔多怕，竟然話唔排除提出特權法。
三星：今日回覆
田二少話早前曾去信邀請土瓜灣站同會展站嘅承建商出席周五嘅鐵路事宜小組特別會議，但禮頓噚日中午回覆話唔出席，三星就話今日先至回覆，基於事件嘅逼切性，佢噚日已向立會內會提出動議，要求引用特權法授權鐵路事宜小組有傳召權，以傳召相關政府部門、港鐵公司同承建商出席立法會可能喺暑假舉行嘅會議。
至於毛孟靜今日喺大會提出引用特權法查土瓜灣站，田二少話如果毛嘅動議獲通過，佢會撤回自己提出嘅動議，目前亦傾向支持毛嘅動議，因為現時「無乜理由」唔支持。對於自己嘅動議會唔會被建制派支持，佢話暫未接觸建制派了解投票取向，直斥禮頓：「我做主人嘞，開會嘞，佢（禮頓）都唔嚟，係極之不尊重我哋鐵路事宜小組，既然（禮頓）擺明係咁，我無理由唔去傳召佢㗎？」