正當世界盃打得如火如荼，全世界都為之瘋狂之際，喺英超方面，換咗新領隊嘅阿仙奴又再簽一人喇！周二阿仙奴官方宣佈，希臘後衞柏柏斯達夫普路斯由德甲球會多蒙特來投。唔覺唔覺，原來由夏天轉會窗重開去到家吓，阿仙奴都已經簽咗成三個球員，但都好似唔係好多人關注咁，認真陰功。
現年30歲嘅希臘後衞柏柏斯達夫普路斯將會着起兵工廠嘅5號波衫，雖然喺阿仙奴嘅官方公佈之中就冇透露到轉會費係幾多，但有英國傳媒就估計係1,700萬鎊（約1.8億港元）。值得一提，Papa已經係阿仙奴由今年冬季轉會窗計起，所簽入嘅第三名前多蒙特球員，意味Papa將會同前隊友米希達利恩，仲有奧巴美揚喺倫敦再度聚頭。
蜜蜂為減稅拖延交易
喺轉會窗重開之前，傳媒就已經一直盛傳Papa會加盟兵工廠，但一直只聞樓梯響，再過多個幾月之後，Papa終於都正式加盟。有德國媒體就爆料，指其實兩間球會一早就已經為Papa加盟達成共識，不過過去一年，多蒙特賣出奧巴美揚同埋奧士文尼迪比利，除咗令球會轉會收入大增，但同時亦都需要承擔高昂嘅稅款。所以為咗令收入唔好再增多，令到球會要再交多啲稅，先至拖到七月先正式轉會。
柏柏斯達夫普路斯就表示：「阿仙奴係英超三大球隊之一，有好多球迷同悠久嘅歷史，好高興未來可以幫助球會發展。」認真識講說話，相信唔難取得球迷歡心喇。當問到兩位前隊友有冇落足嘴頭游說佢加盟，Papa就話兩位前隊友都有叫佢過嚟，仲同佢講話阿仙奴就好似個大家庭咁。
艾馬利大變革快手簽老將
家吓由艾馬利執掌嘅阿仙奴，一改過去險簽嘅風格同簽幼齒嘅政策，已經簽入咗列治史迪拿、賓特尼奴同埋Papa呢三個平均年齡都有30歲嘅球員，但風頭都唔及曼聯一個費特洛迪古斯咁勁。不過兵工廠三個簽入嘅都係防守球員，睇得出艾馬利治下引援方針上嘅改變。球會噚日就同後衞哥林張伯斯續長約，再加上隊中王牌奧斯爾取代離隊嘅韋舒亞會改着10號波衫，即管睇吓咁多變動嘅兵工廠，下季會唔會有一番新氣象。