爆相爆片：
又避狗？　的士自炒　仲想撞阿Sir？

幾時都話「行車保持兩秒距離」，讀者何先生就完美示範，成功避免一場交通意外，不過對方就好似未瞓醒咁，仲差啲撞到阿Sir。
的士司機何先生喺星期一晚10點幾，載住乘客由港島經西隧出九龍，當駛到連翔道上維港彎迴旋處嗰陣，前面一架的士突然撞向路中間防撞欄，之後打橫停喺路中，好彩何生煞得切，先冇撞埋去。

稱閃避切線車輛

咁啱嗰時有架警車停喺旁邊嘅奧海城，車上面兩位阿Sir即刻行去現場了解，點知喺呢個時候，架的士突然間開車，撞向左邊鐵欄，再向住阿Sir方向直衝，好彩阿Sir走得快，先冇被撞到咋。喂！的士大佬，你醒未呀？何先生話當時真係嚇到個心離一離，好彩煞得切，個客先冇受傷，何生開車走嗰陣，咁啱涉事司機落車，先發現係一位阿叔，車上仲有細路，唔明對方點解咁揸車。
警方回覆話，一名62歲姓莫司機，聲稱閃避切線車輛發生意外，車上一對33歲及10歲母子，分別臉痛及前額輕傷送院，警方正調查意外原因。