【本報訊】暑假臨近，不少學生哥、待業人士四出尋找兼職工作，賺取外快，但不少騙徒覷準機會，在熱門網上平台發招聘帖文，強調短時間內可「搵快錢」。《蘋果》找到受騙事主自白，踢爆新興的「假撳錢黨」騙局，聲稱代為撳機提款，撳60萬元便可獲5.5萬元報酬，過程僅需兩至三小時，但要求先交500元按金。有事主更連續被哄騙兩次失款共1,000元，事後大嘆：「可能我入世未深，有冇咁大隻蛤乸隨街跳呀？搵快錢有冇可能呀？」
記者：李啟發 劉卓瑩
現年20歲的劉先生數月前在facebook見到招聘帖文，表明「零風險快錢限期最後2日」，遂透過whatsapp聯絡「僱主」Kelvin。對方透過錄音表明工作僅純粹幫朋友撳錢，「撳走30張（信用）卡（嘅錢），每張撳2萬，30張總共60萬，就有5.5萬（收入）」；另可選擇撳15張信用卡（30萬元），報酬2.8萬元。
稱「唔會犯法」
Kelvin強調過程最長僅兩小時，並會安排專車接送往油尖旺一帶撳錢，完事後即場以現金出糧，但要求必須先交500元按金。劉先生決定先試做15張信用卡，並過數500元給對方。不過，Kelvin其後以「老細唔畀佢攞咁少卡」為由，要求劉加碼至撳30張卡。劉氣憤稱：「交咗錢之後，佢（騙徒）又話唔得喎，作咗好多個理由，我已經開始覺得受騙，（但）我畀多次機會佢，加多500蚊畀佢。」劉前後共付1,000元，但對方即去如黃鶴失去聯絡。
記者放蛇聯絡Kelvin，他聲稱「做埋呢一、兩日就唔做」，又強調過程「同普普通通撳錢一樣，完全唔會犯法，完全冇風險」，並指曾有人撳錢後走佬，令他及公司損失60萬，故要求先付按金，「我哋唔係驚你走數，淨係要confirm到你出嚟」。但當記者問及「撳咁多錢，真係唔犯法？」他突然發惡稱：「你呢個卧底，你同我行X開啦，你呢個差佬烏龜卧底。」
求職騙案趨增
網上求職騙案有上升趨勢，根據警方統計，今年首季接獲58宗個案，涉款780萬元，金額超越去年及前年全年數字；相反，去年及前年全年分別只有87及51宗同類騙案，損失金額分別為670萬及700萬元。