嗇色園黃大仙上契儀式嚟到第三年，園方今年決定搞搞新意思，第一次搞埋孔聖開筆禮（圖），招收300個9月升小一嘅學童參加。黃大仙係道教寺院，點解唔搞文昌開筆禮，而用儒家代表嘅孔子做禮拜對象呢？黃大仙祠監院李耀輝就話佢哋都唔想信眾太過迷信，始終文昌帝君只係民間傳說，咁不如用歷史人物兼萬世師表孔子啦，又可以宣揚尊師重道精神。
做乜無啦啦搞開筆禮呢？李耀輝解釋話近年社會戾氣增加，耐唔耐都聽到家庭爭產、後生仔喺校內衝擊高層同鬧老師嘅新聞，話青少年倫理孝念差咗好多喎，年輕人如果唔識尊師重道有反叛性，出嚟社會做乜嘢都唔會成功㗎！咁如果冇得揀又點算先？李監院話老師冇料咪唔跟佢囉，但都要保持尊重，仲教大家唔聽書咪閉目養神。開筆禮每人收100蚊，現正接受報名。