今年7.1遊行人數略為下跌到5萬人，雖然唔少傳統民主派政黨嘅7.1街站籌款數字都因為咁下跌，但仍然有團體嘅籌款數字逆市上升，當中除咗包括民陣、人民力量，仲有去年備受打壓、有成員被褫奪立法會議席嘅香港眾志，同埋被DQ立會議席嘅劉小麗主持嘅小麗民主教室。
先講講籌款數字下跌嘅團體，上年7.1吸金能力最高嘅社民連，今年籌款就輕微下跌一成，籌得46.3萬元，其實社記個數算唔差，相比之下，其他政黨嘅籌款數字就少啲，公民黨、民主黨及工黨，分別籌得22.3萬、12萬及8.5萬元，新民主同盟就得4.7萬元。而負責協助被DQ議員和佔中九子籌募訟費的「守護公義基金」，今年就籌得50多萬。
吸金王眾志53萬稱冠
至於今年籌得嘅捐款喺「逆市」之下仍然有增長嘅香港眾志，今年仲係「吸金王」，籌得53萬元，冠絕民主派，仲比去年多出近10萬元。小麗民主教室就籌到27.6萬元，比去年多咗8.6萬元。民陣亦籌到20萬，比去年17.5萬略多咗2.5萬左右。
至於前日擺街站踢吹氣足球而俾警察包圍嘅人民力量，籌款數字都有小額升幅，籌得18萬元，比上年多萬幾元。眾志噚日就喺facebook發文，感激市民解囊相助，又話未來會喺公民運動、國際連結、檔案研究、青年組織等各層面，繼續耕耘，守護港人自主、爭取民主自由，與港人共抗專權。
李八方