薯片叔叔曾俊華過完冷河，即投身商界做投行，搞金融科技同資訊科技，上星期佢係facebook發文，話佢去上海出席世界移動大會論壇，同觀眾分享「移動身份」（Mobile Identity）未來同前景，估唔到佢此行都有奇遇，去到上海一樣遇到粉絲包圍。
忙裏偷閒參觀博物館
薯片叔叔噚日又喺facebook發文，話佢近年返國內多數係官式訪問，所以就算去不同內地城市，都冇乜機會四圍睇睇參觀，上星期難得去上海出席世界移動大會論壇，自然趁今次機會順道去上海市歷史博物館，同埋上海革命歷史博物館參觀，點知咁啱又畀佢遇到一班嚟自香港，亦係去上海考察嘅學生，雖然薯片叔叔冇講佢同班同學傾乜，但佢貼咗張相，又係成班同學圍住佢影相同合照，同一年前選特首時冇分別。有時人氣同支持度，真係同有冇做官、做特首冇直接關係。