從689起，到交棒777，許多事情，愈走愈偏。偏爛！
遊行中途加入者，警方內地公安附身，揚言「必定對違法者採取果斷行動」。中途加入違邊條法？明砌生豬肉！記者在內地採訪被公安圍毆㩒地銬手，看來將會是香港警察的愛國模仿垂範！中途加入，甚至會被控暴動呀！689超閒，玩fb超喪，有此定論，毫不為奇。
好了，你無打算中途加入，以為無犯禁，唔會領紅。但黑哨與你和港鐵同在！出門前做好搭車的生涯規劃，聽專業人士的忠告：想長命些，千祈咪去沙中線紅磡站月台！港鐵N咁多個站骨牌式被揭豆腐渣，證據確鑿，港鐵對違法者採取什麼果斷行動？原來係對上報的分判商封殺，以後唔使旨意中標！自恃無人知地盤剪咗幾多條筋，港鐵高層與高官一於扮癡呆，以為黐咗柒條筋，就過到骨！香港唔係冇球員，卻由智慧與處理能力同樣零的高官，與前柱用上帝之手救波的港鐵高層做後衛，場波唔使VAR都知一定出糗！跪着賺的高官高層，自綁手腳說調查，距離完場只得十分鐘，有充份理由相信，這幫契弟晉級升職不特止，還倒賺一筆掩口費。有689那五千萬，抑或更多？