九龍西補選11.25舉行,建制派至今未定人選,如果食衞局前局長高永文唔肯落場,可能由經民聯深水埗區議員梁文廣上陣。梁文廣係西九新動力成員,梁美芬仲係佢紅娘,「我太太係芬姐當時嘅統籌主任,嗰時我成日趁lunch time搭巴士去搵佢撐枱腳,所以芬姐係我紅娘。」
初中留班被母罰企
84年出生嘅文廣細個住喺旺角板間房;由於勁貪玩,喺聖芳濟書院讀書時都參加唔少課外活動,成績唔多好,初中試過留班,「我媽媽好嚴,知道我要留班,罰我要秤住階磚罰企,我咁活躍但係唔准郁,好辛苦㗎」。知衰後發奮圖強,放學後一定溫書盡力追落後,最後攞過當時有團體舉辦嘅油尖旺最佳進步獎。高中去咗天主教新民書院,先後喺浸大完成中國商業副學士課程同公開大學獲中國商業工商管理學士學位。畢業後想做議員助理,最終獲深水埗前區議會主席陳東聘請,2011年區選一擊即中贏埋民協對手連任至今。