法國喺今屆世盃率先打入八強，上周六16強同阿根廷激戰下以4:3險勝晉級，前鋒基利安麥巴比梅開二度做英雄，賽後實至名歸獲選為全場最佳球員。
每場有1.8萬獎金
19歲嘅「忍者龜」年少成名，難得嘅仲好有愛心，法國《隊報》報道， 麥巴比係法國當地慈善機構Preiers de Cordees嘅贊助人，佢會將喺今屆世界盃贏得嘅所有獎金捐出，幫助殘疾兒童參與體育活動。
1958年世界盃決賽，當時年僅17歲嘅巴西球王比利，梅開二度幫巴西擊敗瑞典封王，之後就到麥巴比，成為比利之後喺單場世盃比賽連入兩球嘅最年輕球員。唔計額外獎金，麥巴比每一場為法國上陣都會收到1,700鎊（約1.8萬港元），如果喺比賽再有好表現，獎金當然會加碼。外界估計如果法國贏到今屆世界盃冠軍，麥巴比將會得到高達26.5萬鎊（約270萬港元）嘅獎金，家陣麥巴比踢咗四場，都有成七萬港幣獎金左右等佢捐。
忍者龜一年前以先借後買形式，由摩納哥轉投入巴黎聖日耳門（PSG）之後，目前身價高達1.66億鎊（約17億港元），成為最貴價年輕足球員。身價高收入自然唔會少，據報周薪高達29萬鎊（約300萬港元），難得嘅係麥巴比識得幫助貧苦大眾，願意付出去做善事。
麥巴比帶領法國以4:3擊敗阿根廷後名聲更響，一班名將都睇好佢，仲得到杜奧巴、舒利亞同奇連士文等傳奇前鋒高度評價。前車路士前鋒杜奧巴話：「麥巴比具備所有條件，已經係全能前鋒。」前英格蘭國家隊中鋒舒利亞就話：「麥巴比技術非常全面。要物色一位最佳前鋒，入球能力固然係首要考慮條件，而麥巴比嘅速度同埋控球能力都好出色。」外號「金色轟炸機」嘅德國名將奇連士文話：「佢有無限潛能。」