搭巴士撞正惡乘客，唔單止車長頭痕，其他乘客都一樣遭殃。好似噚日傍晚6點幾，有部E34A龍運巴士由機場開往天水圍，點知上層有女乘客上車冇耐就投訴冷氣唔夠，多次跑落樓下鬧車長。結果車長要喺東涌纜車站停車，叫全車乘客轉搭下一班車。
由日本返港、喺機場上車嘅乘客李小姐（化名）坐嗰部E34A下層，佢話嗰位女乘客講廣東話但口音唔正，上車不久就大吵大鬧，投訴「好熱、冇冷氣」。當巴士駛到東涌纜車站時，車長就停車叫嗰位女乘客轉下班車，但女乘客唔肯。李小姐話：「其實巴士上係有冷氣，全車都冇人覺得熱，淨係佢（女乘客）覺得熱！」不過李小姐亦話車長冇通知全車乘客要轉車，其後下一班巴士到站時車廂爆滿，大批被迫轉車嘅乘客無法上車，最後佢哋要求原先嘅車長重開停駛嗰部E34A，擾攘大約半個鐘巴士再開動，但嗰位投訴女子就走咗。龍運回應話，車長曾解釋巴士因為停喺露天地方，要一段時間先降到溫，但女乘客唔滿意，仲指罵車長同報警。