做生意有錢銀糾紛在所難免，其實有乜嘢不滿，應該冷靜傾吓，或者循法律途徑追討，而唔係以報復方式解決。
事主上月另起爐灶
喺馬頭圍道紅磡廣場地下經營電腦用品店嘅黃先生，新店開張啱啱一個月，但估唔到6月28日（上周四），竟然有人踩上門潑黑油，令佢損失慘重。由黃先生提供嘅閉路電視片段見到，一名頭戴鴨舌帽、黑色口罩，身形略胖嘅男子，喺當日下晝4點幾，拎住一個紙杯，行入黃先生舖頭入面，隨即向門口展示櫃上嘅貨物潑黑油，之後丟低個紙杯就施施然離開，整個過程只有3秒。
事發當時，黃同埋一名店員喺店入面，當時舖頭冇客人，肥仔離開之後，黃發覺唔對路，走去貨架度望吓，並且即刻追出想截住個肥仔，但對方已經不知所終，黃即刻報警。
黃先生話，原本喺呢個商場同朋友合資開店，近排因為意見不合拆夥，上個月另起爐灶開新舖，黃唔排除淋油同拆夥有關。而警方已經將案件列作刑毀，交九龍城警區刑事調查隊跟進。