行銷A早日約左丁山吃早餐傾吓小小推銷計劃，所謂早餐，並非早上七點幾八點之工作早餐，而係九時半後慢慢吃之茶餐廳早餐，問行銷A係唔係去翠華，佢話域多利皇后街今年有咗一間「華豐」，就是在原來阿信屋759原址，阿信屋因經營問題，閂咗幾間舖，呢間大舖就裝修後變成「華豐」，中環人都知道幾十年來華豐在威靈頓街，燒臘者多，叉燒燒肉夠正斗，但不知從何時開始，大約係第二代接管後，逐漸將業務重心放在茶餐廳，今年在中環街市對面開業，憑新裝修，夠光猛，搶咗翠華一啲早餐午餐生意，賣燒味則與同街之龍記、鄰街（租庇利街）之金華鼎足而立，有排爭。
行銷A少咗去翠華，鍾意幫襯華豐，食三十幾蚊嘅叉燒通心粉加炒蛋多士與奶茶，佢話：「去文華酒店食早餐，幾百蚊一餐㗎，請你嚟呢度，慳好多！」冇乜所謂嘞，最緊要叉燒與炒蛋多士夠好食。點知食餐未完，行銷A收到電話，話寶貝仔在學校忽然頭腫面腫，皮膚出現大塊風疹，跟住傳來圖片，俾左丁山一望，哎吔，該煨咯，小學男孩口唇紅腫，晒士好似脹咗兩倍。行銷A幾乎標出眼淚，叫學校送兒子去威爾斯急症室，然後匆匆趕出去搵的士過海。
後來問佢兒子究竟發生乜嘢事，佢話極可能係「味精超級敏感」，事緣早一日佢個仔話同學成日去快餐店食午飯，但佢從未去過，係要行銷A帶佢到大X X，兩人共吃一碟炒飯，吃咗一半，就覺得鹹，要猛飲水，於是唔食，點知一日後，寶貝仔就要入急症室，威爾斯本來擠滿人，但醫護人員見小童如此模樣，臉上肌肉腫脹擠迫眼睛到一條線咁，即刻唔駛小童等候三四個鐘，立即送入急症室及治療，但風疹形成後，非一日兩日可以消紅消腫消痕，行銷A睇到痛到入肉入心。左丁山最初以為佢個仔係食物敏感，例如對花生敏感之類，依家先知道味精敏感呢回事，仲可以搞成咁嚴重，為人父母真係時刻擔心，倍受壓力，既驚兒女入唔到名校，又驚兒女有敏感症，會諗盡辦法為兒女安排好生活。左丁山問行銷A：「以後點辦？」行銷A答：「醫生吩咐盡量避免皮膚直接受太陽曬，導致乾燥與汗漬，不吃有味精食物。好彩阿仔鍾意睇圖書，咪帶佢去室內泳池游水及學習捉棋囉！」醫生又話畀過多壓力予小童，都會催生敏感症。咁就難哉，同時學習普通話、鋼琴、畫畫與英文寫作，算唔算壓力呢！