「切勿跟車太貼，時刻保持兩秒距離」，呢個道理似乎唔係人人都明，為咗慳幾秒出事，你話幾唔抵呢！
話說噚日朝早7點幾，粉嶺公路往九龍方向近康樂園有兩架平治（Benz）相撞，仲要搞到封咗兩條行車線，啲車塞到死晒！
炒車司機擦傷送院
由網民提供嘅車cam片段，清楚拍到事發一刻，當時兩架分別黑、白色嘅平治，喺粉嶺公路快線行駛，尾隨嘅白色平治，緊貼黑色平治行駛，黑車突然收慢，白車收唔切掣撞咗埋去，黑車失控鏟向右邊水馬，360度打咗個觔斗先跌返落地，車cam主人原本喺中線行駛，嚇到大叫「嘩」一聲，好彩佢即時抽去慢線，否則可能三車串燒。
好彩黑色平治上嘅50歲姓吳男司機只係手腳擦傷，仍然清醒，事後由救護員送院治理。而白色平治35歲姓莊司機未有受傷，意外後接受警方調查。受事故影響，現場交通一度擠塞，龍尾長達3公里，去到九龍坑，直至9點半清理完畢先回復正常。