南韓國家隊喺世界盃出局之後，上周五就坐飛機返老家，而除咗隊長奇誠庸有事未隨隊之外，其餘22位球員同職員都一齊飛返仁川國際機場。正當球員們着到西裝骨骨咁喺機場接受傳媒嘅提問，現場球迷竟然向球員掟雞蛋同埋攬枕等嘅嘢。雖然分組賽出局，但話晒都叫做贏過上屆世盃冠軍嘅德國，畀吓面好喎？
孫興民幾乎中招
雖然今屆世盃南韓成功以2:0擊敗德國，但三場波落嚟只係一勝兩負，再一次無緣16強，有球迷就趁足總主席鄭夢準發言時掟雞蛋同埋攬枕，個蛋仲差啲掟中喺對德國時幫南韓埋齋嘅主將孫興民㖭。而教練申台龍喺事後嘅發言就大賣口乖話：「冇球迷支持，就冇可能發生到喺1%機會下贏德國嘅奇蹟，但提早出局的確令我遺憾。」
奇誠庸投紐記避一劫
其實14年世界盃未能出線16強後，當時南韓球迷亦以雞蛋招呼國家隊。更有球迷喺青瓦台國民請願網站留言要求解散南韓足總，指南韓足總過去20年都受財閥現代集團鄭氏家族把持，腐敗問題嚴重，必須要解散足總，重振南韓足球。
前面講到隊長奇誠庸因為有事冇同大隊一齊返國，因乜事令佢避過一劫呢？原來佢係飛咗去英國同紐卡素簽約。奇誠庸今年夏天同降咗班嘅史雲斯約滿，而紐卡素上周五就喺官網宣佈，同呢位自由身嘅南韓中場簽兩年合約，亦係球會繼早前買斷斯洛伐克門將杜巴夫卡之後，夏季轉會窗第二位買入嘅球員。
奇誠庸效力過新特蘭同些路迪等英國球會，「喜鵲」領隊賓尼迪斯就話：「我好開心奇誠庸嘅加盟，佢係一個有豐富英超同國際賽經驗嘅球員，亦係國家隊隊長，所以簽入佢唔需要諗太多。」