世界盃進入下半場階段，十六強淘汰賽於6月30日開始，晚上十時由法國對阿根廷，今早凌晨二時由烏拉圭對葡萄牙，讀者閱報時，已經知道賽果。今晚十時，主辦國俄羅斯迎戰西班牙，明早凌晨會由克羅地亞對丹麥。賽前靠估，睇好西班牙與克羅地亞。
左丁山不少朋友今年下注世界盃足智彩，輸多贏少，大嘆難賭，最主要原因是傳統強隊如巴西、西班牙、法國、阿根廷等等的表現不算有說服性，伊朗、摩洛哥、塞內加爾和日本則有驚喜。因是之故，陰謀論四起，假波之說，講到似層層，一些賭波朋友對此深信不疑。
左丁山一向唔信陰謀論，如果只係賭主客和三種結果，講陰謀論，相信有人打假波，仲要下注就係任人擺佈，畀錢幕後莊家，邊有咁笨㗎。真係有人操控賽果的話，快啲離場啦，下注嚟做乜。踢世界盃係為個人光榮、國家榮譽而戰，踢假波嘅機會好少，左丁山相信「性本善」論，從來唔信世界盃打假波。
有人話美斯邊有咁水皮㗎，踢巴塞似外星人，踢國家隊就冇厘神氣，仲唔係造假？其實睇深一層，所有世界盃球星，都在歐洲球壇搵食，尤其是英超西甲德甲法甲意甲，每年球季冗長，爭奪歐聯歐霸及足總盃冠軍嘅球星級球員，要到五月尾先至休息，約兩星期後就要加入國家隊集訓備戰，鐵人都會患上金屬疲勞症啦，年過30嘅球員，更加惡頂。美斯兼且有天生毛病，靠巴塞垂青，不惜工本來培育佢嘅體質，打荷爾蒙針，今年已經三十歲，相信黃金時期已過咯，在巴塞，美斯多年來有沙維，恩尼斯達餵波供應，前鋒有伊度奧、伊巴謙、亨利、蘇亞雷斯，尼馬等人分散對手注意力，於是美斯可盡情表演，但在阿根廷隊，中場無人，後防靠過氣老將，前鋒全是攻擊性冇一個做前後串連工作，故此克羅地亞一早睇穿晒，全場盡量不讓美斯有空間踢波，咁就贏咗三比○。葡萄牙神鋒C朗第一場對西班牙，鼓其聯賽餘勇，大發神威，但以後兩場對摩洛哥、伊朗，又見有疲態，毫不起勁水準下降不少。今年弱隊遇上強隊，多用泊巴士死守突擊戰術，如前鋒夠速度便可建奇功（如墨西哥勝德國）；今天足球戰術流行巴塞式短傳，控球在腳幾好睇，但遇到密集防禦，短傳滲透幾難入波，如果唔係有運，葡萄牙、西班牙經已給摩洛哥、伊朗淘汰出局了。德國對韓國慘敗○比二，主因係星級球員似已體力透支，搶波都唔夠韓國球員咁有拼勁，於是自1938年以來，第一次德國不能進入16強淘汰賽，同樣係因為球星疲勞症！