不經不覺，48場分組賽賽事已經踢完，16強亦順利誕生。今屆與過往世盃的最大分別，相信是少了很多無謂嘈音，降低觀賞水平，亦令人明白專業足球評述員的重要性。昨晚適逢沒有球賽觀看的日子，《蘋果》體育特別邀請了專業評述員何輝，與網上足球評論員何Wayne，一同主持直播節目《如何講世盃》，用他們的專業角度分析16強走勢。且看他們能否估中稍後舉行的法國對阿根庭與烏拉圭對葡萄牙。
「雙何會」其實也是何Wayne的成就解鎖，一直視何輝為偶像的他，有幸跟對方同場講波圓二十年夢，是繼冰島在世盃舞台發亮後又一勵志故事。
烏拉圭VS葡萄牙
何輝：烏拉圭 何Wayne：葡萄牙
何輝：「其實好難估，但烏拉圭有高甸同荷西占文尼斯，好頂得。」
何Wayne：「呢場我覺得好悶，係C朗同蘇亞雷斯鬥突破足球理論，即係突然間做咗啲戰術以外嘅嘢。我覺得C朗狀態好啲，所以揀葡萄牙。」
法國VS阿根廷
何輝：法國 何Wayne：法國
何輝：「阿根廷一定主攻，而法國一定係穩陣先。阿根廷雖然有比較多個人能力可以改變戰局嘅球員，但夾得唔好，呢個係涉及整體意識問題同青訓問題。法國呢方面好啲，但你睇得出，佢個陣靠撞。同埋後防線啲人變得好犀利，呢啲都係少少擔心。」
何Wayne：「法國得一種方法會輸，就係用4312 用銀河唯一（基奧特）鬥快，但唔夠快。其他方法就算係法國主攻定阿根廷主攻，我都覺得法國機會大啲。」
巴西VS墨西哥
何輝：巴西 何Wayne：巴西
何輝：「呢個唔使揀啦！巴西隊波其實去到現時為止都係游刃有餘。同埋墨西哥嘅卡路士偉拿係好明顯踢唔晒90分鐘。」
何Wayne：「我申報先，兩年前已經揀巴西。睇外圍賽已經見到好犀利。」
比利時VS日本
何輝：比利時 何Wayne：比利時
何輝：「呢個都係唔使揀，雖然我着住日本衫。如果係日本嘅話，應該爆到阿媽都唔認得。」
西班牙VS俄羅斯
何輝：西班牙 何Wayne：西班牙
何輝：「俄羅斯有個問題，好明顯個教練係唔鍾意卓利舒夫，只不過冇人換，一定要換佢。
死啦又入咗兩球，仲換佢出嚟嘅，又唔係有體力問題，有乜理由換卓利舒夫而唔換森美杜夫？我諗都冇乜人揀俄羅斯。」
何Wayne：「有啲危險要射十二碼，因為西班牙其實個組合都唔係咁好, 猜嚟猜去最後搵迪亞高哥斯達搞掂。」
克羅地亞VS丹麥
何輝：克羅地亞 何Wayne：克羅地亞
何輝：「克羅地亞有場波絕對要講，就係對阿根廷。阿根廷輸，當然佢哋有問題，但你細心留意克羅地亞，係佢哋迫到阿根廷踢唔到。你再睇會發現呢隊波個全面性係好得人驚，分分鐘行到去決賽。」
何Wayne：「克羅地亞係整體意識嘅代表。丹麥嘅反擊銳利度唔係好強，雖然有基斯甸艾力臣，但係薛斯圖個意識好差吓。」
瑞典VS瑞士
何輝：瑞士 何Wayne：瑞典
何Wayne：「兩隊波套路都係得傳中球，瑞典喺進攻嘅拿捏同防守方面都比瑞士好啲，我揀瑞典。」
何輝：「我揀瑞士，雖然兩隊波差唔多，但佢始終有多幾個快戟，可以突然間攞人命嗰啲人，譬如梳頓沙基利。同意高波瑞典係OK勁。」
哥倫比亞VS英格蘭
何輝：英格蘭 何Wayne：英格蘭
何輝：「唔講英格蘭可能已經畀人鬧！有樣嘢未知，占士洛迪古斯唔知得唔得，最尾嗰場傷咗出去。天氣熱啲，法卡奧嗰啲都開始頂唔順，同埋佢冇乜人換。反而英格蘭好多人差唔多，變咗用起上嚟好啲。可惜你睇返佢哋23人名單，3個龍門7個閘都已經10個人，連埋前鋒同5、6個側擊，結果防守中場得番艾歷迪亞同佐敦軒達臣兩個。」
何Wayne：「英格蘭三中堅可以引到哥倫比亞去攻，英格蘭就唔需要主攻，唔需要去做佢哋最唔識做嗰樣嘢。英格蘭同哥倫比亞互相對攻嘅話，英格蘭其實係年輕啲、快啲。」