一名八旬老婦前晚（29日）六時許在深水埗桂林街擺賣時，被大批食環署職員及警員包圍及檢控阻街，輿論狠批執法者不近人情及執法不公。《蘋果》昨午接觸到當事人吳婆婆，她批評執法者「後生嗰啲又唔捉，專捉老人家。」她指警方擾攘多時，最後由多名男警「夾硬」推她上車，出手打傷她的小腿和腰，腿部出現輕微瘀傷，「因為我（唔肯）上車，所以咪打我囉！我犯咗乜嘢錯呀？夾硬推我上車！」
吳婆婆前晚已獲釋，但指警方充公了她的手推車及部分貨物，整個執法過程令她很不開心，「我食都食唔落，尋晚佢有畀飯我都食唔落呀！我一個老人家，我又冇販毒，嗰班人竟然拉我上車喎！（你嬲唔嬲？）嬲乜啫，我都唔曉嬲。個個都冇捉，係捉我，睇我唔起囉！我唔識講廣東話嘛！」帶客家話口音的她指警察態度兇惡，「佢話（嫌棄）我慢慢慢，車仔乜都畀佢收咗！」
據了解，吳婆婆本身獨居於另一區，有一子一女，但家境欠佳，鄉下尚有一名年約百歲的中風母親需要照顧，因此只靠綜援及平日擺賣雜貨維生，她指擺賣只能日賺數十元，收入微薄。
協助吳婆婆的香港野豬關注組幹事黃豪賢指，自己常於深水埗活動因而認識婆婆。他表示前晚食環署連同警方接近20人圍住吳婆婆，執法者的情緒非常不冷靜，警車堵住桂林街通道，又有約50人圍觀，但警方只不停驅趕旁觀途人，對付婆婆猶如對方是恐怖分子。他指警方的言語非常粗暴，「其中一位警員係鏡頭面前話阿婆『唔好郁手郁腳』、『係咪80歲婆婆就唔使拉呀？咁警察唔使做嘢啦？』呢啲係無謂、低質、挑釁市民嘅言語，但佢調番轉話係我哋煽動市民，令事件升溫。」
他形容警方處理手法不冷靜不專業，才令市民看不過眼挺身而出。他續指，如果社會上一個八旬婆婆要靠自己擺賣維生，政府有責任反思是體制上出現甚麼問題令一個老人家淪落至此，「我哋唔係要去仇警仇食環，而係咩原因令到一個婆婆要執人哋唔要嘅嘢攞去賣維生，佢一日賺得幾十蚊，票控佢千幾蚊，佢點負擔？好不近人情。」他認為執法部門亦應好好反思不得民心的原因。
立法會議員鄺俊宇表示關注事件，也希望食環署能酌情處理該名長者的情況。「長者只想安享晚年，但香港不少長者未能老有所依，還要以執紙皮、執垃圾等賺取薄微收入。」鄺同時表示昨夜行動有否涉過多警力，將去信食環署署長促跟進事件。
街坊王小姐對婆婆的遭遇也相當氣憤，「（執法者）欺善怕惡囉！北河街嗰啲好多外傭都擺，夜晚好多南亞裔又擺，佢哋又唔拉，係拉阿婆。」她指欽州街不時都有老人家擺賣雜貨為生，但「成個南昌街、黃金商場門口好多人賣耳機，佢哋又唔會捉，淨係捉呢個位。星期日嗰邊又變到印尼咁，又唔捉，我唔明點解只係捉呢度。」她批評執法者選擇性執法，認為「要執就一齊執，唔好只係執阿婆，你咁樣擺明蝦阿婆。」