蘇偉賢馬房在周日(7月1日)沙田賽事，有匹新馬「好運」千呼萬喚始出來，終於首次登場，呢匹身價450萬之香港拍賣馬，早被晨操客好評，腳法熟練而有速度，出爭第二場四班1000米直路賽，肯定備受矚目。
「好運」自柏寶接手打理後，只要他有到場，此駒例必由他主操，共親操超過70課之多，而且常見馬主親臨觀操，顯得相當重視。
今朝（30日）又見柏寶專登為了「好運」到場，全日獨試此駒便收工，鍾愛之情表露無遺。唔止咁樣，課罷蘇偉賢親到機坪接馬，並捉住柏寶雞啄唔斷，表情肉緊，以動態角度來睇，擺明決心爭取一出即勝。
事實上，「好運」母親SEAMSTRESS的同父同母弟弟SEIDNAZAR，曾在兩歲一級賽藍鑽石錦標獲亞，家族非常早熟。「好運」最近試閘亦輕鬆追上跑第三，狀態已操起，直路賽抽11檔正好發揮水準。