專打中平價市場的Motorola moto手機，雖然說不上功能出色，但勝在有創意，如左右擰一擰機身即可啟用相機，揈一揈手機即可開啟閃燈。今次新推出的兩部中價手機moto g6 plus同g6，同樣從玩味出發，同樣配上18:9屏幕，又有1,200萬像素加500萬像素雙鏡頭設計，但當然配備5.9吋屏幕的moto g6 plus，在硬件規格方面會比配5.7吋屏幕的moto g6為強，前者內置Snapdragon 630，後者用Snapdragon 450處理器。兩部手機都用上4GB加64GB配置，同樣備有快速功能。
從表面睇，兩部新手機的規格都唔見得特別，但內置的拍攝功能算得上幾好玩。兩部新手機都內置「臉部濾鏡」功能，自拍時可以加入不同配飾扮鬼扮馬，最有趣是戴上太空人頭盔呃Like。記者請來模特兒用moto g6 plus自拍，相片效果在手機上觀看效果還算唔錯，但傳至電腦時再睇，會發覺色彩偏淡兼輕微偏色。如想直接拍攝「退地」相片，亦都可以用上「去背」拍攝模式，退地速度都算幾快，不過試了幾張，手罅位退唔到。
至於雙鏡頭拍攝效果算幾好，記者即場以moto g6 plus試拍模特兒，對焦快且準，曝光及自動白平衡亦算幾準，但較可惜是近期好多手機都有的AI場景模式，就未有在這兩款手機中出現。兩部新手機的價位都算吸引，moto g6 plus同moto g6分別只開價$2,699及$2,299，不過香港就只會返深藍色機款而無其他顏色，稍嫌保守得滯。
記者、攝影：布偉倫
全新旅遊專頁，即like籽想旅行： https://fb.com/travel.appleseed
