練馬師麥菲文和其澳洲同鄉騎師貝湯美，在港只合作贏過一次「老實人」，而此駒將於周日（7月1日）沙田日馬再出，角逐第四場四班1200米草地賽。
這對拍檔今朝（29日）亦有搏殺動靜，麥菲文在機坪附近，捉住貝湯美傾咗好耐，只見麥菲文神情嚴肅，似乎在講解「老實人」的戰略安排，而湯美仔則仔細聆聽，兩人明顯對今仗爭取連捷決心甚大。
「老實人」可謂貝湯美的私家馬，這匹3歲質新分子，至今4戰皆由湯美仔操刀，取得1冠1亞1殿佳績，馬兒既有實力，亦正在不斷進步中。
而且「老實人」備戰甚有誠意，本來剛於上月底取勝，贏開的馬操練毋須太辣，但拼後仍試了課大閘，並一放到底，力谷狀態才再跑。
今次「老實人」班次路程不變之餘，只比上仗多負兩磅，抽6檔亦理想，看來麥菲文、貝湯美有望攜手建功。