【特約報道】
最近世界盃喺俄羅斯踢到㷫烚烚，憑住一口唔鹹唔淡嘅廣東話同靚仔樣深得大家歡心嘅俄仔Ansheles亦都唔輸蝕，身兼兒童節目主持、Youtuber等多職嘅佢，今次仲喺ViuTV嘅新節目《返歸啦俄仔》領軍做導遊，同三位唔同風格嘅少女返去俄羅斯，由莫斯科、喀山到索契玩到盡，相信別有一番旅遊風味。
Ansheles今次返家鄉仲會重遇13年前嘅初戀女神，搞到Ansheles勁緊張，連對方嘅戀愛狀況都唔夠膽問。反而女神就大爆Ansheles小時候嘅瘋狂行為，原來Ansheles為咗吸引女仔注意，成日搵青蛙嚇佢哋。有次女神生日，Ansheles為咗迫人錫佢，就攞住把刀圍住間餐廳追咗佢好耐，唔通呢啲係戰鬥民族嘅特別追女仔技巧？
今個旅程仲有一位神秘嘉賓，就係喺網上面有130萬點擊率嘅短片主角、飲涼茶飲到想嘔嘅Ansheles媽媽。Ansheles媽一見到阿仔就好熱情咁衝埋去攬住佢，仲準備咗傳統音樂表演同食物歡迎佢，但Ansheles就好尷尬，事關呢件事正正發生喺機場出境門口，所有經過嘅人都望住佢。Ansheles就話雖然好開心，但想盡快走人，兩母子相當搞鬼！
