劉德華監製的原創劇集《東方華爾街》，昨晚在尖沙嘴舉行慶功宴，主要演員吳鎮宇、張孝全、張可頤、譚耀文、羅家英及蔡潔等都有出席撐場。華仔剛獲邀成為美國奧斯卡金像獎評審委員，加上老婆朱麗倩早前出席公開場合時，腹大便便疑似有孕，難免被記者圍攻。不過華仔否認說︰「其實我喺fan club已經話冇，不過『我會努力向上』，希望唔會話唔想，順其自然。」
劇集盼長拍長有
華仔指今次由美國福斯傳媒集團投資的《東方華爾街》，即將開拍第二季，作為監製的他，笑說要睇餸食飯︰「集數少就可以加budget，但集數多就要小心控制，大概13集左右。我都希望今年可以開拍，自己就當長片拍囉，嚟緊嘅形式應該好似真正嘅劇集。新加演員未知，原班人馬就一定。」問到會否客串一角，他搞笑說︰「唔知呀！不過第三季先啦！唔使主角，重要就得㗎嘞！」
除了做監製，華仔近日忙於拍電影《掃毒2》，他表示︰「𠵱家一星期開工四日。係呀，你唔覺得我靚仔番？」問到又要拍戲、又要做監製，更做埋奧斯卡評審會否太忙？他說︰「評委工作仲未開始，我會先了解吓同請教吓前人先。不過好開心可以做到評審，睇到唔同製作同片種，我應該夠時間睇晒啲片，唔睇晒唔可以投票，呢個係gentlemen game，你話自己睇晒都得，不過我唔會咁做。」
鎮宇「叫有交代」
另外，《華》劇男主角吳鎮宇就指未收到開拍第二季的消息。他說︰「拍唔拍就要睇時間。之前都擔心會唔會有第二季，今次叫做有交代。希望可以一個系列咁拍落去，至於加唔加人工就要問Fox嘞。」張孝全就話好期待，更指與原班人馬拍第二季一定非常好玩。
採訪：卓寶花
攝影：仇志德