唔只買樓要靠父蔭，喺娛樂圈發展都係。好似樂壇有位「公主」，姑勿論佢唱成點，單係睇佢外形已經唔想睇，好在佢老竇「皇帝」喺娛樂圈有影響力，所以都有唔少機會。先排仲歌而優則演，拍埋電影。早幾日「大聲公會」搞春茗，公主掹車邊出席。當然佢畀人安排坐喺後排。春茗去到尾聲，會長不停叫啲藝人上台唱歌，好似「金毛」、「好男人」、「靚仔」上台，有人見到公主由原本後排，慢慢移到台前，唔使問梗係博畀人叫埋上台啦。可惜班大聲公真係識佢老鼠，就連「長頸」同唔識唱歌嘅「長髮」都有份，就係偏偏冇叫佢，搞到佢悶悶不樂。
經理人幫倒忙
公主其實成日都攞架嚟丟，好似近日佢參演歌舞劇，有場戲佢同其他演員一齊合唱。試戲嗰陣導演見佢去到高音有啲辛苦，所以就指派咗其他演員唱嗰一part，公主今次都有自知之明，改唱和音就算。都話成功同失敗背後，都會有一個女人。到正式嗰陣，公主經理人「遲到」出現，見到自己藝人畀人「蝦」，梗係同導演死過。最後公主「成功」唱番part主音。不過一拍埋其他人，佢段solo真係嚴重失色，拉牛上樹咁，同埋班歌友個個都揞住半邊嘴笑到收唔到聲。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。
