國足雖然入唔到今屆世盃決賽周，但好多中國球迷都去咗俄羅斯趁墟，佢哋之前仲喺俄國街頭揮舞五星紅旗大叫「中國加油」。至於前日嘅世盃F組賽事，效力中超廣州恒大嘅中堅金英權為南韓先開紀錄，直接將衞冕嘅德國踢出局，甚至連唔關事嘅中國都興奮埋一份，中國媒體更以「中超外援殺死衞冕冠軍」作為標題大事報道，難怪有網民笑言「贏國又贏」！
內地網民都恥笑媒體貼金
今年一共有九位中超外援參加世盃，除咗金英權之外，好似恩歷克卡拉斯高、荷西方迪、馬斯真蘭奴等大牌球星都有入選。不過估都估唔到，最先入波嘅竟然係名氣唔大嘅金英權。睇見金英權咁威水，一眾中國媒體都衝晒出嚟抽水，標題全部都同中超扯上關係，「中超外援世界盃第一球誕生！恒大鐵閘逼瘋德國」、「中超榮耀！金英權破門創歷史」就係例子。內文都離不開吹捧中超點厲害，連已經離開咗中超、上季由恒大轉投巴塞隆拿嘅巴西中場荷西保連奴都被拖埋落水，有中國媒體盛讚兩人的表現，「（金英權及保連奴）各自的國家隊最終取勝立下汗馬功勞！這是屬於中超的榮耀！」
墨粉多謝南韓涉種族歧視
由於吹捧的程度實在太過火，連內地網民都睇唔過眼，一齊留言恥笑「現役恒大球員金英權進球……所以恒大昨晚是最大贏家？」、「這樣貼金很尷尬」、「這也能拿出來吹？」
其實除咗金英權以外，「K-pop門將」趙賢祐嘅表現亦好搶眼，成場波左飛右撲化解咗德國唔少攻勢，賽後仲當選MVP。效力韓職FC大邱嘅佢希望可以去歐洲，尤其係到英格蘭落班，好似隊友孫興民咁闖出名堂。
由於「太極虎」贏咗德國，搞到同組嘅墨西哥就算輸咗畀瑞典都可以次名出線，不過墨西哥粉絲多謝南韓嗰時玩出火，做出「扯眼角」嘅種族歧視動作，隨時令墨西哥有手尾跟！