世盃求驗客：朗尼搵美金落實投華盛頓

世盃踢得如火如荼，但各大球會嘅轉會運作就冇因此而停落嚟。據英國《天空體育》報道，32歲嘅英格蘭國家隊入球王朗尼，已同意加盟美職聯嘅華盛頓聯隊。朗尼喺佢twitter上載佢搭飛機嘅相，仲用emoji圖案嚟表達飛緊去美國，相信好事近。

據講，華盛頓同朗尼經理人已達成協議，將會喺當地時間禮拜四確認加盟，球會亦安排咗喺下禮拜一舉行記者會。至於朗尼就會着手辦理簽證同工作證，有可能最快喺禮拜六就同新隊友一齊訓練，不過就要等到下月10號轉會窗重開後先正式過檔。一般估計，朗尼喺美職聯嘅「地標戰」可能係下月14號主場對溫哥華白帽嗰場。
近年唔少英超球星都視美職聯為職業生涯嘅尾站，就好似朗尼嘅前曼聯隊友伊巴謙莫域，就效力緊洛杉磯銀河。