英格蘭禮拜四喺俄羅斯世界盃G組最後一輪對比利時嘅大戰前，九位WAGs喺聖彼德碰頭一齊食晚飯，當然唔少得爭研鬥麗大晒行頭，當中後備門將尼克普比嘅女友Shannon Horlock仲係名門之後㖭。
尼克普比女友至索
「三獅軍團」禮拜日喺俄羅斯世界盃次輪分組賽大炒巴拿馬6:1，唔少球員嘅另一半都喺看台上撐場。賽後，比克福特同哈利馬古尼都特登跑到場邊看台，各自同女友咀嘴慶祝。九位「三獅」WAGs禮拜四聚會時，都吸引到唔少途人目光，喺2013年就同尼克普比一齊、年僅23歲嘅Shannon唔只樣靚身材正，佢老竇仲係曾效力曼城嘅北愛爾蘭名宿賀洛克，真係大有來頭㗎，而佢着住對索價670鎊（約6,960港元）嘅高踭鞋，相當搶鏡。
雖然史東斯嘅青梅竹馬女友Millie為人低調，但24歲嘅佢全身行頭都價值不菲，除咗件1,500鎊（約15,600港元）嘅白色外套、575鎊（約5,970港元）嘅高踭鞋，仲有個1,090鎊（約11,320港元）嘅YSL手袋。雖然占美華迪只係喺大勝巴拿馬一役下半場後備上陣，但佢老婆Rebekah喺WAGs聚會中，就着住條售價約663鎊（約7,000港元）嘅Zimmermann紅色連身裙褲，值得留意嘅係，呢個澳洲品牌仲係凱特王妃嘅最愛。至於英格蘭世盃大軍中最年輕、只得20歲嘅拉舒福特，佢嘅女友Lucia亦有份參與今次聚會。
鍾斯肖像權值2,900萬
另外，曼聯守衞菲爾鍾斯比賽時向來表情多多，不論爭頂或者攔截時都會露出神怪表情，繼而引起網民熱議。據英國《太陽報》爆料，26歲嘅菲爾鍾斯嘅肖像權由四年前嘅2.2萬鎊（約23萬港元），急升至現時嘅280萬鎊（約2,902萬港元），真係豬籠入水。