玄學節目《玲機一動》前晚直播第三集，呢集麥玲玲師傅同大家探討整容係咪真係可以轉運，仲請埋「過來人」趙詠瑤（Kimi）同張沛樂（沙律）做嘉賓！
提升外緣運
Kimi話自己係整過容，佢仲話整容冇話畀阿媽知：「係整完七日之後媽媽先知，仲俾阿媽鬧。」玲玲姐就話︰「整容係可以加強外緣運，即是外在緣份，靚啲見人當然着數啲，我覺得少少微調，對人緣真係好咗。但鼻樑扁改到鼻樑高都唔會嫁到有錢人，因為係命生成。」不過玲玲姐就話眼大就會桃花運好啲，下巴整得太尖又唔會咁好，因為下巴代表晚運。
講到面形，沙律面比較方，玲玲姐話︰「方面嘅女仔好捱得，要做好多嘢。」沙律仲拎埋細個嘅相出嚟，雖然佢話冇整過，但都分別好大。至於有男友林耀聲嘅沙律又會幾時結婚呢？玲玲就話兩、三年後，而沙律都預計係呢啲時間。