趁住世界盃熱潮，八方邀請立法會議員波牛獻技，試吓佢哋的波、盤波同射門，睇下係咪有姿勢又有實際？結果最好波嘅係全立會最細粒嘅議員喎！
身高1米9嘅民建聯何俊賢係今屆立法會足球隊隊長，佢賽前自言體能麻麻，「有信心過到（關），但肯定唔會好」，結果20秒內連續的波唔算標青，八字盤波又有啲論盡，叫佢射門都中龍嘅，五球都有一球入。原來佢年輕時踢波都係後備居多，點解做到隊長㗎？「其實做隊長都係主要幫隊員訂吓位、安排吓泊車箒」，服務精神值得讚。
雖然叫阿強，但工聯會郭偉強唔係小志強，冇猛虎射球但可以龍門側邊掃入，入唔到波時仲跪地抱頭有世界級演出。查實阿強同東區的士大佬有隊波，至今續有落場打真軍，所以連續的幾下波都冇難度，盤波就有啲抆水，中間仲跌倒「受傷」。佢賽前預告球技中規中矩，「由於冇操練，所以係唔得嘅」。
尹兆堅踢到變龍門
民主黨尹兆堅唔係立會足球隊成員，但球技都算唔錯噃，頭頂胸槌腳踢都有連續性，扭波都算順暢嘅，射波時最初唔多順，捉到路後連環入。呢位波牛話落場位置都同體形有關，越細個踢得越前，大咗開始做進攻中場負責派波，唔夠人跑後就踢清道夫、中堅，「終於走唔出做龍門」。
被同僚公認最好波嘅陳沛然醫生Pierre果然冇令人失望，一落場就上身，連續輕鬆的十幾下波，八字盤波又冇甩腳，射門仲連續幾次射入中心，果然一枝獨秀。細細粒嘅佢球技精，或者因為中學時已經由朝踢到晚，喺家係醫生隊隊員，有次戰術上需要擺咗佢喺後備，其後佢一出場就頂入一球，「全場最矮嗰個頂入，都係幾難忘」。
李八方