有錢唔一定有品，同樣地，揸靚車同駕駛技術或者安全意識都完全冇關係。好似老蘭呢架「狂牛」林寶堅尼咁，就完美示範呢個理論。
直衝吧枱飲酒客
前晚8點幾，老蘭有林寶堅尼表演「超低智唔拉手掣極速溜前」。由閉路電視片段見到，一位外籍型男當時坐咗喺斜路上一間餐廳嘅靠街位置，架無人駕駛嘅黃色林寶突然溜前衝咗落嚟，停咗喺型男面前，好彩佢眼明手快，連人帶枱向內縮，而林寶亦及時停低。
好彩平日嘅老蘭人唔算多，如果唔係就大鑊。外籍型男定一定神之後，同其他顧客望住部車研究，更加豎起拇指，係讚緊個車主，定係讚部車靚呢？架黃色林寶實在太搶眼，好快就吸引途人圍觀，舉機拍攝，擾攘咗差不多兩分鐘，有一位白頭佬施施然行埋嚟，原來佢就係車主。大哥，雖然行開一陣啫，但你唔會唔知呢度係斜路嚟㗎，只拉一下手掣有幾難呢？佢上車前sorry都冇句。你唔志在架車，但途人嘅命仔好寶貴㗎。