世界盃前夕俄羅斯負面新聞多多,其中指當地足球流氓肆虐,唔少英格蘭球迷擔心治安問題唔敢去,暴龍哥就話傳媒要為球迷疏落負上責任:「嚟俄羅斯嘅英格蘭球迷真係唔多,我認為要歸咎英國傳媒嘅渲染手段,佢哋係咁話球迷嚟到俄羅斯會被毆打、社會恐同之餘,種族歧視問題又嚴重。」
暴龍哥決定去俄羅斯之前都曾經猶豫過,所以四月特登跟隨阿仙奴作客莫斯科中央陸軍考察民情:「我哋當時盤算如果感覺良好就會返嚟,所以我哋就嚟咗囉!我已逐漸愛上俄羅斯,俄國人樂於助人,下諾夫哥羅德市民平日少見外人,你睇佢哋幾開心。」
暴龍哥話世界盃匯聚各地文化,無論嚟自墨西哥、哥倫比亞定日本嘅球迷都打成一片,佢期望借ArsenalFanTV嘅報道改變外界對俄羅斯嘅負面印象,吸引更多英人嚟到俄羅斯:「我有說話要同英格蘭球迷講,如果你哋有機會嚟嘅話,一定要嚟,呢度絕對會令你感到眼前一亮!」佢仲話希望隨住英格蘭成績漸入佳境,會有更多三獅球迷赴俄羅斯支持。