這日在街上碰到金融界朋友W，見佢眉開眼笑，問佢係唔係攞到一大筆年中花紅，朋友W答：「股市大跌，走得摩，冇鼻哥，畀癲普貿易戰搞到中港股市大亂，今年一月到六月尾，做得個吉，鬼有花紅分咩。」又係嘅，今年以為五窮六絕魔咒，不會再出現，形勢甚好，點知仍然走唔甩，四月三十日恒指有30808點，這日（6月21日）只得29296點，兩個月唔見咗5%，跌幅雖然唔大，事實上炒股就係白做？大摩吹笛追魂，指恒生指數會繼續跌，警告股民不要撈底，散戶係要小心啲？有早知，冇乞兒，假如嚴守老格言，Sell in May and Go Away，依家舒服好多。
然則金融W點解仲笑得出呢？佢話：「哈哈哈！我個寶貝女真係叻，一擊即中，憑實力，叩門考試，面試，入到最著名女校呀。」哦，恭喜晒，開心死咯，此乃不少父母家長夢想，女兒入到第一女校，直情開心過得到公司派年中獎金花紅，但如此一來，女兒點返學呀，識得金融W咁耐，知道佢家住港島東區，而名女校位於九龍中區，返學幾花時間。
金融W又笑，賣咗樓嘞，我地會搬過去九龍中，阿女行路返學都得；賣樓換樓呀？金融W話：「唔係，暫時買唔到，只係租住先，再等兩年，希望租約滿前搵到另外一個單位買入！」
咁就有風險咯，假如樓價續升，兩年後樓價比現在高出一兩成，損失幾大噃；但此乃目前香港人換樓之難處，唔係人人都咁好運，可以同時間賣樓換樓嘅，總有一個時間差，如金融W就因女兒上學問題，趕住暑假搬屋，九月女兒開學，故此先賣後買。另一係朋友Y家住沙田，本想先賣後買，誰知搵到合適村屋之後，拍板落實，現在搬咗屋嘞，舊屋仍然無人問津，於是要兼顧兩間屋。究其原因當然係購買力湧晒去一手樓，二手樓市場受辣招影響，成交淡靜，有時叫經紀搵人睇樓，經紀都交白卷，令有意賣樓嘅二手樓業主，十分無奈。現時金融W就冒上賣咗買唔番嘅風險，而樓房又冇期貨可以對沖，未來兩年見到樓價上升就會唔開心，況且每個月交租幾萬元又係幾肉赤嘅。左丁山後來遇到代理P，問佢如何處理同類問題，代理P話：「我叫過客人唔賣樓，放租，自己就搬屋交租！可以降低樓價上升風險。」