香港貓界代表忌廉哥,想挑戰俄羅斯官方失聰神貓,不過肥嘟嘟可愛到爆的忌廉哥一出腳就露餡,竟然唔吼英格蘭貓糧,揀吃巴拿馬茶禮。賭仔如果係忌廉哥的鐵粉,不如問吓同樣都係哥,哥斯達黎加鐵定冇機,哥倫比亞危危哋,咁脫胎換骨的墨西哥有無機會捧盃?
貓眼睇足球,花多眼亂,等於劉姥姥入大觀園。喔,有無上海人報復性改為劉外婆入大觀園?姥姥大戰外婆,來回短傳,雙方走位,高下立見。上帝的歸上帝,姥姥的歸姥姥,出版社將這一股北方吹過來的歪風強加小學二年級的課本中,上海爸媽堅決打交叉說不。保衛外婆戰,一面倒大勝完場。
世界盃地面戰仍在進行中,白界以外的中美貿易戰亦已開打,美國隊長特朗普全力防中,凍結敵方前鋒。中國則不斷出口術,搬龍門。球迷預言,如果下屆中、美、朝殺入四強,大殺傷性武器必然盡出,打波兼打爛仔交,打唔贏賴地硬發爛渣,隨時誤觸世界大戰的按掣……噢,都係講返波,在習帝的足球強國夢未竟前,波,仍然係圓的。忌廉兄,咪鬼理婆婆姥姥,繼續自由自在食你的花生吧,喵。