浸信會倪姓牧師被指控性侵，直認不諱主動到差館落案，向查詢的記者表示願意接受法律審判，似乎打算搬演杜斯妥也夫斯基的《罪與罰》。誰不知有位大愛包容的女教友挺身而出，大言不慚「牧師都係人，都會犯罪，可能有啲嘢控制唔到」，呼籲大家「要畀機會原諒牧師」。阿彌陀佛，報導不是說他歷年屢犯，兼且受害人之中不乏未成年少女嗎，「有啲嘢」的失控，看來已經遠遠超越輕輕發落限度，竟然建議慈母多敗兒式的縱容，真是聳人聽聞。我們這些無宗教信仰的地獄永久居民，雖然慧根欠缺冥頑不靈，倒也多多少少聽過耶穌故事，左面頰和右面頰雙雙奉上的偉大教訓略有所聞，但是明明有狼還若無其事主張繼續跳舞，豈不是等於送羊入虎口，me one不夠來個me two me three，慷他人之慨助長罪行？火唔到肉唔知痛可以去到這種境界，不由你不讚歎「厲害了，我的教友」。
此言一出驚震四方，網絡毒舌紛紛啟動，盡情挑戰人身攻擊底線：「小姐，閣下咁嘅尊容，真係冇乜人想掂你，你執執個樣，化少少裝，條木屍可能會掂吓你，到時你先再講原唔原諒呢啲廢話啦……」連我這麼刻薄的賤嘴也甘拜下風，將素來捍衛的政治正確拋諸腦後，騎騎騎笑咗先至算。嗱嗱嗱，呢位心胸廣闊嘅姊妹第時聽到有人搞基，千祈唔好唔記得慈悲為懷啊吓，就算冇人稀罕你施捨原諒，都要一視同仁以「有啲嘢控制唔到」為開脫理由，咪好學唔學，學嗰啲一時一樣亂搬龍門嘅政客，嚴拒從來冇傷害過任何人嘅同性戀者於天堂門外啊吓。