KOL做實驗，港鐵車廂高歌「世界真細小」希望吸引乘客一起高歌，結果一如所料，沒有爆冷，就像打工仔要求老細加人工時得到的反應，零·反·應。
KOL的結論是，香港人很難笑得出，不容易快樂。
其實事出必有因。
第一，你揀錯歌啦施主。你唱「世界真細小」，迫在港鐵車廂的打工仔只會想起「間屋真細小」、「廁所真細小」、「客廳真細小」、「床位真細小」，很快便會把「世界真細小」最後一個字變成「動詞」使用。崩口人忌崩口「小」，教我如何笑得出。
第二，你揀錯人啦施主。你不應該以一個黑頭髮黃皮膚的「自己人」身份上陣，香港人從來唔buy。用西人啦！西人做甚麼都是對的，西人坐地下擺背行囊就是瀟灑自我不拘一格真性情，學吓人哋浪遊世界啦死仔；相反唐人不理是國內同胞還是香港自己友，你躺臥打地鋪擺行李便是野蠻無品自私罔顧他人。西人借酒攬攬錫錫是「人哋鬼仔性格比較open」，唐人則肯肯定是鹹豬手非禮正賤男。所以，香港人看見一個香港人在車廂扮熱情興奮要你合唱，只會「藐嘴」﹕「做乜啫你？搞乜啊﹗」但如果換轉是西人，我相信港人便會釋然：「好正啊！個鬼佬隨時隨地都可以唱歌真係好friendly」。西人就係好玩，港人就係玩嘢。
第三，你揀錯標題啦施主。KOL以「香港人應該開心D」作為實驗目標，那是行不通的。你應該包裝為，「車廂唱歌接龍挑戰」，即係扮作是「冰桶挑戰」，改一個名「Railway challenge」，港人最愛迎合世界潮流，屆時連清潔阿姐都會響應。
第四，你揀錯對象啦施主。你應該找馬時亨做實驗，在他面前唱「if you're happy and you know it」，如果佢仲OK笑得出，我哋咪一樣OK笑得出囉。