呢間叫「日乃屋」嘅咖喱店係神田咖喱大賞嘅得獎店舖，喺東京有唔少分店，不過我覺得高田馬場店好食啲。講到咖喱辣度，呢間店牆上有個2018年挑戰者排行榜，最高食到65級辣度，而歷年最高辣度係70級，鍾意食辣嘅朋友，可以搵店員挑戰吓。
旅遊東京，總有被忽略嘅地方，例如高田馬場。上年我留學高田馬場某日語學校，所以比較熟悉呢個地方。除地點就腳外，便利店超商齊全，還有喺BIG BOX嘅100YEN店，真係非常方便，不過今次要介紹嘅係我最鍾意食嘅燒芝士咖喱飯。我本來唔太鍾意食奶味太重嘅芝士，但呢個燒芝士係我少數鍾意嘅，可能因為芝士燒完後同咖喱味道好夾，加上咖喱本身有肉粒，口感就似食緊有芝士味嘅熱浪薯片咁。
南蠻炸雞我食過唔少，呢間店先用特製醬汁淋雞塊，之後再油炸，由於炸粉好薄，唔似一般炸雞咁多粉，配洋葱沙津醬感覺唔太油膩，配燒芝士咖喱一流。
日乃屋カレー 高田馬場店
地址：東京都新宿区高田馬場2-14-3三桂ビル1F
時間：每天11:00am開店，年中無休
採訪：潘宗孝
全新旅遊專頁，即like籽想旅行： https://fb.com/travel.appleseed