《確膚寧呈獻－戰地直擊》英格蘭大勝巴拿馬6:1曲終人散，英迷紛紛離開下諾夫哥羅德，《蘋果》世盃直擊隊竟喺酒店大堂巧遇香港人稱「暴龍哥」嘅ArsenalFanTV（阿仙奴球迷電視）主持「Troopz」，自然唔放過訪問機會同佢傾吓英格蘭同阿仙奴。
跟隊撐場：炒巴拿馬瘋狂
直擊隊上周知道暴龍哥會去下諾夫哥羅德睇英格蘭對巴拿馬，一早約佢賽前做訪問，佢都一口答應，可惜比賽當日人多擠逼就見唔到。本來以為訪問冇行，但第日反而喺酒店大堂遇到佢拍檔Robbie，輾轉下終於搵到暴龍哥做訪問。提到今屆英格蘭冇咩星味，但踢出炒對手6:1嘅驚喜作，暴龍哥直指瘋狂：「我98年去過法國睇日本對牙買加，但今次係我第一次認真跟隊支持英格蘭，我只能用『瘋狂』嚟形容呢場比賽，對阿仙奴球迷嚟講上季亂七八糟，但我慶幸可以喺國家隊搵到啲快樂。」
英格蘭好少可以喺大賽狂數對手，暴龍哥大讚球員放低包袱，進攻銳利，仲預言有機會問鼎冠軍：「對比經驗球員好多顧忌，年輕人就初生之犢不畏虎，領隊修夫基放手畀球員表現自我，每次進攻都感覺似就入波。正如葡萄牙都贏到歐國盃，只要我哋保持進攻風格，鞏固後防，足球世界咩都可能發生。」
今屆英軍陣中得韋碧克一個阿仙奴球員，死敵熱刺就有五人入選，熱刺射手哈利卡尼仲要係隊長，但暴龍哥就話身披三獅球衣要放下門戶之見：「我討厭佢哋，但呢個係國家隊層面，大家都要將球會事拋諸腦後，我信如果韋碧克射入致勝球，熱刺球迷都會好開心。」佢仲大讚嚟自熱刺嘅右翼衞捷比亞表現鶴立雞群：「對巴拿馬佢交足功課，無論傳中、攻防、助攻都做得好好，即使卡尼入咗五粒係金靴大熱，但捷比亞嘅表現仲有驚喜。」雖然係咁，但素來抵死刻薄嘅暴龍哥梗要抽吓熱刺水：「反正熱刺冇咩機會贏錦標，如果英軍贏到世界盃，就畀卡尼佢哋試吓捧捧盃囉。」
槍手迷大方祝福韋舒亞
暴龍哥因鬧爆前領隊雲格成名，雲格終於out咗，來季改由艾馬利執教，佢都好開心咁話：「我只希望可以重返歐聯，唔想新領隊有太大壓力。雲格係一個大問題，佢六年前就應該要走。我哋要向前望，雲格嘅離開令我好開心。」但佢就對中場韋舒亞走有唔同感覺：「我好傷心，佢同我好似都了解球會文化，明白佢因冇法得到穩定上陣機會所以走人。」雖然暴龍哥好傷心，但都大方祝福韋舒亞。
《蘋果日報》記者洪量丰、禤家民俄羅斯現場直擊