臨返工至嚟塞車！噚日朝早8點至8點半上班繁忙時間內，北大嶼山公路入機場方向，先後發生4宗交通意外，搞到成條北大嶼山公路打晒蛇餅，龍尾由近欣澳港鐵站對開塞到汲水門大橋近馬灣，入東涌或者要去機場嘅市民真係急到不得了。
當中較嚴重的一宗發生喺8點03分，涉及一部的士同三部客貨車，據稱四輛車沿北大嶼山公路同一線去機場，前三車因車多要收慢，點知最後一架客貨車跟車太貼收掣唔住，衝前搞到四車攬炒，車禍有三人受傷，分別因腳痛、扭傷頸及腰傷要送院，好彩都唔算好傷。
網民途經現場發現塞車，當然即刻拍片擺上網，仲上載埋google地圖交通路況顯示有幾塞，等其他駕車人士等得嚟都知道發生咩事，最後網民仲通知一聲9點40分後清場全通，做埋馬路天使嗰份。