大台喎，梗有大台「風範」，即係縱使傷及無辜，都唔會有少少便宜畀大家佔到，而人民力量陳志全應該對此好有感受。
話說慢必噚日中午一度喺fb發片，剪輯咗佢早上喺立會民政panel嘅發言，點知po咗一陣就被block，原因係tvb舉報侵犯版權，慢必嬲到喺fb發帖控訴，「有冇咁霸道？TVB大...曬？」其實慢必發嬲係好有理由，八方問過佢，佢話成條片只係用咗立法會頻道發送嘅發言片，就算TVB用同一條片出埋新聞，都唔等於係侵犯版權，所以即向fb上訴，結果得直仲獲解封，短片重見天日。
自動程式偵查
但慢必未有因此息怒，佢話就算係因為自動程式而令短片一度被指侵犯TVB版權，「咁都係會殺錯良民，要大家去申訴後再開番，TVB都要檢討㗎」，其後佢再喺fb發帖指，「一條立法會官方片段，是我今早立法會的發言，我哋自己錄影自己剪片，點解TVB提出版權爭議，還把我們的影片下架？」唔知有冇其他人同慢必一樣，無辜辜因為大台霸權慘中招？