【話你知】
噚日朝早出現嘅雙彩虹，天文台有留意，仲喺fb發文，收集唔同網友嘅相片，尖沙嘴、天水圍、九龍灣、馬灣、土瓜灣、北角等地區，都有市民影到彩虹。
天文台科學主任楊威龍指出，彩虹出現嘅原理，係陽光經過水滴時，會折射、反射再折射離開水滴，當中光線反射時就會產生彩虹。至於雙彩虹就係光線經過兩次反射，所以就會出現第二道彩虹，其實平常亦有機會出現，只不過可能唔夠光或者背景太花，所以先至較難睇到。
陽光角度低 清晨較常出現
如果讀者細心留意，有冇發現較外圍嗰道彩虹比較暗，而且顏色嘅排序仲倒轉咗㖭（藍色喺最外面）。楊威龍解釋，因為光線經過兩次反射，部份光能量會損失，同時光線會倒轉，所以外彩虹先會睇落較暗。
另外，有冇發現早起嘅市民容易見到彩虹？楊威龍解釋，由於一般要陽光嘅角度較低，以及太陽位置喺身後面，先至有利彩虹出現，因此多數清晨或者黃昏先會見到彩虹。所以話早起鳥兒除咗有蟲吃，仲有彩虹睇㖭！