早排環境運動委員會聯同環境局、環保署一齊舉辦嘅「減廢大挑機」網上活動，建制派同民主派立會議員都有挑機。減廢大挑機要連續7日影低自己減廢日常放上網，民記小花鄧麗玲都有玩，點知玩到第4日出事，俾人捉到減廢變增廢。
話說鄧麗玲放上fb張相寫住「食得曬，先好嗌，惜食是福」，佢嘅減廢大挑機就係話自己食晒啲嘢冇浪費。但有網民睇到，佢用咗即棄餐具，而小花似乎知用即棄餐具有問題，所以hashtag 寫住「#叫咗堂食」同埋「#點解俾一次性餐具我」，既然知為乜又放上fb？
噚日小花就再上載咗一張自備餐具嘅相，話上一個post係為咗帶出堂食提供即棄餐具嘅問題喎，又話係自己冇表達清楚要「真誠致歉」，重玩一次減廢大挑機咁話，不過佢亦同時將之前嘅即棄餐具po刪走，但網民一早cap晒相咯。