嚟緊周日就係七一，2003年因為反對《基本法》23條首辦嘅7.1大遊行，時為大律師公會主席嘅梁家傑都有參加，從此踏上政途；15年後做過議員又選過特首，縱然退下火線仍心繫時事，同樣冇變嘅仲有佢老成持重嘅樣子，「我細細個嘅樣已經好老積嘞，返學第一日已經被老師揀做班長。」
今年初「登六」嘅傑哥越見年輕，其實以往無論生活同工作都係領導角色，例如家中佢係兩妹一弟嘅阿哥，喺學校則由小一至中三都係班長。
做班長變孤獨精
佢個人認為個樣生得老積因而被老師委以重任，但亦因為老積令佢初中時代變孤獨精，「梗係啦，我代表高牆，去管理啲雞蛋喎，啲蛋梗係同你唔friend」。中二嗰年見家長，班主任更曾嚇親梁爸爸，「佢話見到我小息時，同學喺操場嬉戲，我攞住包維他奶喺坑渠邊踱步，驚我有自閉症……」可見當時喺九華讀書嘅佢，孤獨程度幾咁嚴重。
做班長做到人見人怕，傑哥開始諗辦法，中四決定加入學生會，「咁就免疫唔使做班長」。當時做內務秘書，簡單而言係打雜，「拖地、倒垃圾、寫蠟紙，乜都要做」。走出comfort zone，傑哥都豁然開朗，至中六就選學生會主席並自動當選。
𠵱家喺法律界咁出眾，但傑哥那些年都諗過做醫生，「因為威囉，覺得做醫生好巴閉」，其後都係覺得法律啱佢多啲，所以入港大讀Law兼識埋太太陳淑儀。而傑哥大學期間遊遍中國大江南北，幾乎只得青海省同新疆未去過，憶述三年嘅暑假都背包遊大陸，因為去歐洲搭飛機太貴，「冇錢吖嘛」。而唔知點解啦（應該唔關佢特別靚仔事……），佢嘅團友都係女同學多，佢記得有次搭火車有個內地人用普通話問佢：「老師帶着五個娃娃去旅行？」一語中的，「我個樣仲唔係老積？」
