英格蘭禮拜日喺世盃G組次輪6:1炒巴拿馬，禮拜一就飛返去聖彼得堡大營，隊長哈利卡尼大演「帽子戲法」之後，直情好似捧咗盃咁凱旋，佢帶住有全隊簽名嘅比賽用足球落機，加埋英格蘭傳媒嘅瘋狂吹噓，睇嚟英軍又變番以前屆屆都話係自1966年後最強嗰隊波。
24歲嘅英軍前鋒哈利卡尼，喺呢場波連中三元，第一次參加世盃，踢咗兩場就入五球，喺歷代英軍國腳世盃單屆入球紀錄，卡尼已經過咗四球嘅靴斯頭，上到第二位，只係同紀錄保持者連尼加相差一球，刷新呢個紀錄在望。
而且，卡尼都係英格蘭歷來第三個球員喺世盃上演帽子戲法，佢當然要拎走個波俾埋隊友簽名留念，隊友迪利阿里就寫住：「一啲都唔意外。兄弟，恭喜你。」𠵱家英格蘭已經提早晉級，尾輪鬥比利時變咗名次之爭，不過卡尼仲想踢：「我希望繼續比賽，保持狀態。」
舒利亞林伯狂讚
而英媒當然唔放過呢個自吹自擂嘅機會，講波嘅舒利亞話：「呢場波頭45分鐘簡直完美，由始至終都係我哋想要嘅完美，死球都係一大殺着。」林柏特就補充：「我哋非常勁，一切都做到足，就係因為英格蘭踢得咁勁，先徹底將巴拿馬比下去。」根據連尼加twitter話，英格蘭場波電視有成82.9%收視，係英國電視史上其中一次最勁嘅比率，拍得住倫敦奧運開幕禮，同時間有1,400萬英國人睇緊。英軍今場仲有一個紀錄，就係哈利卡尼埋齋嗰球，原來經過成25腳、八個球員連續傳送先入，超越咗阿根廷由甘比亞素喺06世盃對塞爾維亞射入嗰球嘅24腳，係世盃有紀錄以嚟最多。
大儍食包睇波好落寞
英格蘭好似如日方中，但兩年前中咗記者扮中東商人嘅圈套涉嫌想收錢提供走法律罅買兵方法嘅前英格蘭領隊艾拿迪斯，禮拜日就畀人影到佢喺倫敦一間酒吧斯人獨憔悴，單拖食住巨無霸漢堡睇住英軍大勝。如果唔係大儍行差踏錯，今屆世盃正路就係由佢帶隊，點知會變咗上任67日就被炒嘅國家隊「最短命」領隊。
Now TV每日只需$6*，
全年睇盡猛片，新劇，世界盃
即刻撳下面登記優惠或致電2888 1888(後按2)申請啦！
https://bit.ly/2JqDJKw
*優惠期有限，受條款及條件約束。