近呢幾日天氣陰晴不定，放假先嚟落雨，確實影響市民心情。不過，喺憂鬱星期一朝早，西區對開海面有雙彩虹出現，驅走唔少人心頭鬱悶。唔少市民都對呢個剎那好風景讚好，覺得「好幸運呀」。
呢個美景喺噚日朝早出現，當時香港多區都有毛毛細雨，雙彩虹喺西區對開海面中央升起，穿入雲層，特別顯眼。再加上晨曦陽光照射下，維港兩岸高樓大廈反射出粼粼金光，美不勝收。
僅維持5分鐘
據住喺尖沙嘴嘅讀者阿Win講，朝早6點45分左右起身，當時天色一般，陰陰沉沉，但一眼就望到窗外雙彩虹，仲話住咗十幾年第一次見到，覺得好驚訝，不過彩虹只係維持大約5分鐘就消失。
讀者梁小姐朝早7點左右亦喺薄扶林道嘅大學宿舍見到呢幕，佢話雖然雙彩虹只出現咗一陣，但覺得好新奇：「因為通常彩虹喺天上面，但佢只係得下面嗰截，喺雲度同個海連住。」有網民喺fb上載圖片，吸咗唔少like，有網民話喺雙彩虹下游水，「感覺很fantastic」， 亦有人話「見到雙彩虹，好運齊來」。
香港以往出現過幾次雙彩虹，其中前年6月29日清晨，西區同樣見到雙彩虹高掛，當時市民拍攝到嘅雙彩虹更為完整，兩個半圓形由海面劃成彩虹大門，令市民嘖嘖稱奇。事隔唔夠一個月，前年7月26日，熱帶氣旋「銀河」悄然離開香港之際，香港多區出現彩虹，其中北角、銅鑼灣一度出現雙彩虹。