民主黨創黨主席「馬丁」李柱銘囝囝李祖詒（Joseph），同莎莎老闆郭少明嘅細女郭詩雅（Kitty）本月2號拉埋天窗後，噚日首次見到李祖詒喺沙田馬場出現，皆因太太Kitty有兩隻「美麗」馬仔出賽，一隻叫「美麗寶寶」，另一隻叫「美麗寶貝」，分別跑第六場及第十場賽事，兩隻馬仔好生性，「美麗寶寶」喺第三班賽跑第四有7.8萬獎金，而「美麗寶貝」就喺第二班賽事跑第一有106萬獎金。賽後李祖詒同太太Kitty及外父外母郭少明夫婦一齊拉頭馬。
郭少明家族馬一向以「美麗」命名，襯晒佢哋間化妝品公司，而噚日贏馬「美麗寶貝」係3歲新西蘭馬，今季才開始在港出賽，已贏咗四場，來季轉四歲，已被譽為新一屆四歲馬大賽台柱之一。至於「美麗寶寶」就係5歲新西蘭馬，今季贏過一場頭馬。