搭的士兜路大家都可能遇過，但搭巴士都兜路，仲兜到迷咗路就真係少有。市民顏先生前晚9點幾喺沙田威院探完病，就喺第一城站搭89X返觀塘，點知遇正大老山隧道有維修工程要改道，仲要個車長唔識路㖭，結果巴士就左兜右兜去咗九龍灣工業區，搞到乘客中途落車，再諗方法返屋企。顏先生鬧爆九巴服務日日退步喎！
乘客鬧爆落車
依照89X嘅正常路線，巴士出咗大老山隧道之後，應該經彩虹出觀塘道，一直東行去觀塘。點知當晚部89X出咗隧道之後，個車長唔識路，兜來兜去就入咗九龍灣，去到工業區嗰邊。當時車上有成50幾個乘客，唔少人都鬧爆：「呢度究竟係邊鬼度？」顏先生話個車長全程冇出聲，又冇同乘客解釋或道歉。「佢越兜越唔知去邊，最後乘客見勢色唔對，全車人都喺偉業街落晒車，自行再搭其他車返屋企」。
顏先生行咗成廿分鐘，行到去牛頭角港鐵站，再搭的士返屋企。佢經歷今次奇遇，一肚氣咁話：「搭咗咁多年巴士，今次真係第一次，好令人懷疑個車長有冇足夠訓練，佢究竟識唔識揸巴士！」
九巴發言人話，當晚因為大老山隧道嘅道路維修工程，89X線需要暫時改道行駛，公司已事先通知車長，亦安排咗督察喺現場協助。對於有車長未能完全依足暫時改道路線駕駛，令乘客不便，公司表示歉意，會按機制調查事件。